Misioni ynë është arritja e një zgjidhjeje të drejtë për çështjen madhore kombëtare.
Këtu, nuk farkëtohet e paqena, dhe për pasojë, pishtari i kaluar dorë më dorë nga paraardhësit tanë e deri tek ne, flakëron si trajtëzim i detyrës sonë historike.
Kombëtarizmi nuk triumfon me fjalë të kota e gjeste teatrale, por me vepra. Kërkojmë të çelim horizonte të reja, por në të njejtën kohë tu përmbahemi parimeve të pacënueshme që karakterizojnë trungun e lashtë të shqiptarit.
Brerore mishëron rrëzëllimin e thelbit shpirtëror shqiptar. Dielli që ndrit, ngroh, e ne kemi për qëllim ngrohjen e zemrave bashkëkombase.
Dija si ushtrim pozitiv i intelektit, është mjeti më i mirë për të fuqizuar flakën e pishtarit tonë, nën trysninë e erërave të kohës
Krahas orvatjeve per atdhe, duam te lehtësojme sadopak, mundimet e sëmundjeve të kohës. Çka kuptohej me tranzicion në fillimet e shtetformimit, sot është shndërruar në një përbindësh që përpiqet të gllabërojë gjithçka.
Ngadhënjimi i lirisë, monument kombëtar, u ndesh me vargonjtë e robërisë, përgjatë gjysmës së dytë të shekullit te kaluar. Sprova vazhdon. Ndodhemi në epokën e turbullirave të mëdha.
Eshtë në dorën tonë, të zgjedhim nëse do të përpihemi nga kjo vorbull derisa të shthuremi tërësisht,ose ti dalim ballas rrezikut e të ruajmë Qendrën tonë të brendshme.
